Ҳамакнун, собиқ сармураббии «Истиқлол» Салоҳиддин Ғафуров боз ба «Вахш» баргашт, ба ҷойе, ки онро барои Душанбе тарк гуфта буд.

Салоҳиддин Ғафуров, ки пас аз ду мусовӣ бо ду заифтарин дастаи Лигаи Олӣ ба истеъфо фиристода шуд, аз ин ба баъд дар «Вахш» ба Аслиддин Ҳабибуллоев мушовир хоҳад шуд.

Торнигори расмии қаҳрамони Тоҷикистон аз қавли Исроил Шарифов, раиси дастаи шаҳри Қурғонтеппа навиштааст, таҷрибаи бузург ва дониши ҷаноби Ғафуров барои «Вахш» зарар нахоҳад овард.

Салоҳиддин Ғафуров собиқаи тарбияи мунтахабҳои миллӣ ва ҷавонони кишварро дорад, то «Истиқлол» дастаи «Вахш»-и Қурғонтеппа ва «Хуҷа Каримов»-и Ғозималикро тамрин дода буд.

Дар мавсими имсола ӯ дуввумин сармураббист, ки ҷоқи корашро иваз мекунад. Қаблан, «Энергетик»-ро Ибодулло Қаюмов тарк карда буд ва курсии ӯро Алиёр Ашӯрмамадов, ки ҳамзамон сармураббии мунтахаби 19-солаҳои Тоҷикистон мебошад, соҳиб гардида буд.

Феълан, «Истиқлол» ба бозӣ бо «Хайр» бо сарварии Қаноат Латифов, мурабии ҷавон, ки соли гузашта барои «Истиқлол» медалҳои тиллои Лигаи якум ва Ҷоми Душанберо оварда буд, омодагӣ мебинад. Вале гап-гап аст, ки ба зудӣ риштаи тарбияи бозигарони дастаи нерӯмандтарини Душанбе ба дасти Ӯроз Турақулов дода мешавад.

Агар ин хабар дуруст барояд, боз ҳама дар фикри он хоҳад буд, ки ҷойи ҷаноби Турақуловро дар «Хуҷанд» кӣ хоҳад гирифт?

Advertisements