Яке аз “шустряктарин” журналистони соҳаи футбол дар Тоҷикистон Фаридун Солиев аллакай исми сармураббии ояндаи “Истиқлол”-ро барои 80 дарсад ёфтааст.

“Варзиш-Спорт”, ки хушбахт аст, ки чунин хабарнигори бало дорад, аз қалами Фаридун чоп кардааст, ки сармураббии нави “Истиқлол” Алиҷон (Олимҷон?) Рафиқов, собиқ бозигари “Помир”-и шӯҳратёр хоҳад шуд.

Дар ин ҳафта мутахассиси 48-сола бояд ба Тоҷикистон меомадааст, то бо раҳбарияти дастаи пулдортарини Душанбе гуфтушунид бикунад.

“Варзиш-Спорт”, ҳамин гуна, ҳадс задааст, ки Алимҷон Рафиқов рӯзи 27-уми июн миёни мухлисони шаҳри Қурғонтеппа нишаста, бозии “Вахш”-у “Истиқлол”-ро тамошо мекунад ва рӯзи саввуми июл дар бозии дӯстонаи “Истиқлол” бо дастаи олмонии “Хессен-Кассел” (Ҳасани касал?) аллакай риштаи идораи дастаро ба дасти худ мегирад.

Рафиқ Рафиқов 30-уми аперли соли 1962 дар Душанбе таваллуд шуда, соли 1988 унвони Устоди варзиши Шӯравиро сазовор шудааст. Футболро аз “Пахтакор”-и Қурғонтеппа дар Лигаи дуввуми Шӯравӣ аз соли 1983 шурӯъ карда, як соли баъдаш ба “Помир” мепайвандад, дар “Помир” танҳо ду сол истода, соли 1986 ба “Кайрат”-и Алмати кӯч мебандад ва дар соли 1989 ба “Помир”-и Лигаи Олии Шӯравӣ бармегардад. Соли 1992, пас аз судути Шӯравӣ ба “Зенит”-и Санкт-Петербург меравад, соли 1993 то соли 1995 дар Набережние Челни “КамАЗ”-саворӣ кардааст, он замон “КамАЗ” дар Лигаи олии Русия буд, соли 1996 ба Лигаи якуми Русия мефарояд, ба дастаи “Нефтехимик”-и Нижнекамск, солҳои 1997 ва 1998 намедонам чӣ кор мекунад, вале дар соли 1999 боз дар “КамАЗ”, ин дафъа, дар Лигаи дуввуми Русия бозӣ кардааст.

Мактаби олии мураббиҳо дар Маскавро бо дипломи аъло хатм кардааст ва бо муҷаввизи навъи «В» дастаҳои Турбина» (Набережние Челни), «Алнас» (Алметйевск), «КамАЗ» (Набережние Челни), «Рубин» (Қазон, ҷавонҳои соли таваллудашон 1993)-ро тамрин додааст.

Advertisements