Нӯъмон Ҳакимов, беҳтарин голзан ва беҳтарин бозигари соли гузаштаи Тоҷикистон, пас аз баҳси мушкил бо сармураббияш Аслиддин Ҳабибуллоев “Вахш”-ро тарк кард.

Хабаргузории “Варзиш-Спорт” бо такя ба қавли худи бозигар навиштааст, муҳоҷими маъруф дар чанд бозии ахири қаҳрамони Тоҷикистон умуман ба феҳраси бозигарон ворид намешавад. Нӯъмон охирон бор пероҳани дастаашро рӯзи 20-уми июн дар бозӣ бар зидди “Энергетик” пӯшида буд, ки бо шикасти дастаи шаҳри Қурғонтеппа анҷом пазируфт.

«Варзиш-Спорт» менависад, дар оғози ин мавсим наздик буд, ки Нӯъмон ба Турсунзода биравад, вале дар лаҳзаи ахир ин иқдом пиёда нагардид.

Феълан, Нӯъмон гуфтааст, эҳтимол дорад, ки кафши бозигари дар майдонҳои “Хуҷанд” боз ба бар кунад. Вале агар ҳатто “Вахш” бо “Хуҷанд” ва ё ягон харидори дигари эҳтимолии бозигараш забон наёбад низ, Нӯъмон Ҳакимов гуфтааст, дигар пероҳани дастаи шаҳри Қурғонтеппаро дар имсол ба бар нахоҳад кард.

Дар мавсими имсола бозигари маъруф бо ин пероҳан 919 дақиқа дар 11 бозӣ дар майдон буд ва панҷ бор дарвозабонҳои рақибро ношод карда буд.

Дар ҳамин маврид, Парвиз Оев, бозигари хуби «Парвоз», ба Ваҳдат кӯч баст. Бар иловаи Парвизе, “Парвоз”-ро тарк кард, “Хайр” ба дили Габриел Донтох, фарангии африқоии ССКА “Помир” низ роҳ меҷӯяд. Вале легионер аз Гана дар легиони “Помир” бояд то охири сол мувофиқи шартнома хидмат кунад.

Ва хабари дигар, ки ҳокияш боз ҳам “Варзиш-Спорт” аст, (албатта, боз аз кӣ ин ҳама хабарҳоро мешунавем охир), ин аст, ки “Истиқлол” барои тамрин ва тафреҳ (бозӣ надорад) ба Қайроқум (чӣ номи даҳшати туркие, магар иваз карда намешавад..), рафтааст.

Advertisements