Бо анҷоми даври аввали чемпионати Тоҷикистон оид ба футбол дар Лигаи олӣ тими «Истиқлол»-и Душанбе бо легионери русиягӣ Роберт Жилин «хайру хуш» кардааст.

Шоҳрух Саидов, президенти клуб гуфтааст, ин тасмим барои он гирифта шуд, ки бозингари русиягӣ интизороти аз ӯ доштаро бароварда накард. Гуфта мешавад, Жилин бо эҳтимоли зиёд идомаи карераашро дар клуби ССКА «Помир»-и Душанбе идома медиҳад. 

15-уми июн дар аввалин даври мусобиқоти қаҳрамонии футболи Тоҷикистон дастаи «Истиқлол» аз тими «Равшан»-и Кӯлоб бо ҳисоби 0:1 мағлуб шуда, дар ҷадвали мусобиқот дар ҷои дуюм қарор гирифт.

Баъди ин бохт масъулони бошгоҳи “Истиқлол” Никола Кавазович, сармураббии ин дастаро аз мақомаш барканор карданд. Шоҳрух Саидов, президенти клуб далели барканории Кавазовичро дар суҳбат ба торнамои «Истиқлол» «натиҷаи ғайриқаноатбахши кори ӯ» гуфт.

Advertisements