New Hopes For “Khujand”

Дар бозии марказии даври 15-ум «Хуҷанд» дар варзишгоҳи «Спартак»-аш ба дарвозаи «Вахш» яке голи беҷавоб зад ва дастаи шаҳри Қурғонтеппаро аз зин фаровард. Голи ягонаи бозиро, ки «Хуҷанд»-ро ба садр баровард ва умедҳои қаҳрамонии дастаро эҳё намуд, Зокир Бердиқулов дар дақиқаи 22-юм ба самар расонд. Бердиқулов, ёдовар мешавам, дар марҳилаи аввал дар «Спитамен» бозӣ мекард.

«Регар» ТадАЗ-и Турсунзода дар Душанбе ССКА «Помир»-ро бо ҳисоби 4:1 шикаст дод. Иброҳим Рабимов ду гол (дақиқаҳои 3-юм ва 28-ум), Давронҷон Тухтасунов (56-ум) ва Комил Саидов (21-ум) якголӣ заданд. Як голи мизбононро Музаффар Фузайлов (89-ум) ба ҳадаф расонд. 

Бозигирони дастаҳои душанбегии «Энергетик» ва «Истиқлол» дар 90 дақиқаи шаҳди голро ҳеҷ начашиданд. Мусовии сифр бар сифр.

Натиҷаи ғайримунтазир дар ноҳияи Бобоғон Ғафуров. «Парвоз»-и ахиран беболу пар гардида, дар майдони худ ба дарвозаи «Равшан»-и Кӯлоб се голи беҷавоб зад. Ду голро Шонаим Бобоев (дақиқаҳои 7-ум ва 30-юм) ва як голро Фарҳод Тоҳиров (89-ум) ба самар расонданд.  

«Гвардия»-и Душанбе дар ин давр бидуни бозӣ бо «Спитамен» бо ҳисоби фаннии 3:0 соҳиби се имтиёз шуд. Дар як бозии санҷишии қабл аз ин давр «Гвардия» аз «Вахш» бо ҳисоби 1:5 шикаст хӯрда буд. Ҳамаи шаш голро қурғонтеппагиҳо заданд. Фақат ин ки Ҷомихон Муҳиддинов, Фозил Сатторов, Аҳтам Ҳамроқулов, Раҳматулло Фузайлов ва Абдуқаюм Қарабоев ба дарвозаи рақиб гол заданду Дилшод Ниҳолов ба дарвозаи худ.

Мавқеъи дастаҳо дар ҷадвали мусобиқа то 14-уми октябр

 Ҷой  Дастаҳо Б П М Ш Т/Т Х
1. «Хуҷанд» 15 12 1 2 32-8 37
2. «Вахш» 15 12 1 2 36-14 37
3.  «Регар» ТадАЗ 14 10 2 2 30-10 32
4. «Истиқлол» 15 9 3 3 30-15 30
5. «Энергетик» 15 7 2 6 34-24 23
6. «Парвоз» 15 5 4 6 20-21 19
7. «Равшан» 14 4 2 8 21-27 14
8. «Гвардия» 15 2 2 11 10-45 8
9. «Спитамен» 15 1 3 11 9-35 6
10. CСKA «Помир» 15 1 2 12 12-35 5

Беҳтарин голзанҳо: Нӯъмон Ҳакимов («Вахш») – 15 гол, Сӯҳроб Ҳамидов («Энергетик») – 12 гол, Пирмурод Бурҳонов («Хуҷанд») ва Юсуф Рабиев («Истиқлол») – 9-голӣ.

Рӯзи 14-уми октябр бозии мавқуфмондаи даври 13-ум байни дастаҳои «Регар» ТадАЗ ва «Равшан» баргузор мешавад.

Ҳамин гуна, «Хуҷанд» боз ба садорат баргашт, ва интригаи сабқати имсола низ побарҷо боқӣ монд. Акнун, бубинем, ки дар даври оянда «Хуҷанд» дар меҳмонӣ бо «Истиқлол» чӣ кор хоҳад кард.

Бозиҳои даври 15-ум: 17-уми октябр – «Парвоз» – ССКА «Помир», «Равшан» – «Вахш», «Истиқлол» – «Хуҷанд», 18-уми октябр – «Спитамен» – «Энергетик», «Регар» ТадАЗ – «Гвардия».