«Футболи Тоҷикистон» даври 25-ум ва охирини озмуни «Футболдонон»-ро оғоз мекунад

16

“Футболи Тоҷикистон” даври 25-уми озмуни «Футболдон»-ро оғоз мекунад. Ин озмун бар асоси пешгӯии натиҷаи бозиҳо баргузор мешавад.

Тариқаи баргузории озмун:

Озмун ба ин тариқа сурат хоҳад гирифт:

Ҳар сари чанд муддат «ФТ» феҳраси 10 бозиро барои пешгӯии хонандагон нашр мекунад. Онҳое, ки мехоҳанд дар озмун иштирок намоянд, бояд аз рӯйи ин феҳрас бигӯянд, ки дар фалон бозӣ ҳисоби бозӣ чанд мешавад…

Бозиҳо:

Барои озмун асосан бозиҳои байнулмилалӣ ба инобат гирифта мешаванд. Асосан, ба бозиҳои Ҷоми ҷаҳон, сабқатҳои қаҳрамонии қораҳои мухталиф ва қабл аз ҳама Аврупо ва Осиё, сабқатҳои дастаии ин ду қора такя хоҳад шуд. Бозиҳои сабқатҳои қаҳрамонии дохилӣ танҳо дар ҳолоти ночорӣ (барои як давр кофӣ набудани шумори бозиҳои байнулмилалӣ) ва ё зарурӣ (бозиҳои муҳим, дерби) ба озмун роҳ дода хоҳанд шуд.

Тақсими холҳо:

Холҳо ин гуна тақсим хоҳанд шуд:

Барои дарёфти ғолиби бозӣ – як хол

Барои дарёфти таносӯби голҳо ва барои дарёфти мусовӣ – ду хол

Барои дарёфти ҳисоби дақиқи бозӣ – чаҳор хол

Қабули ҷавобҳо:

Ҷавобҳо танҳо дар бахши “коммент”-и ҳамин матлаб ва дар сафҳаҳои вижаи торнигор дар Одноклассники ва Фейсбук қабул хоҳанд шуд. Танҳо он пешгӯиҳо ба инобат гирифта хоҳад шуд, ки то оғози бозиҳои дар феҳрас овардашуда ирсол шуда бошанд. Натиҷа ва шумориши ҳар давр низ танҳо дар бахши «коммент»-и ҳамон давр мешавад.

Шартҳо:

Тағйири назар иҷоза дода намешавад. Зери мафҳуми «Натиҷаи бозӣ» вақти асосӣ дохил мешавад. Ҳар иштирокчие, ки се давр пайиҳам бесабаб иштирок накунад, ҳамаи холҳои худро аз даст медиҳад.

Ғолибон:

Озмун то охири соли 2013 идома хоҳад кард ва бино бар натоиҷи он нафари беҳтарин дар се бахш: «Бештарин холи тамоми даврҳо», «Бештарин холи як давр» ва «Ғолиби аксари даврҳо» муайян мешавад. Ҳамчунин, аксҳо ва мусоҳибаи ғолибони озмун дар «Футболи Тоҷикистон» нашр хоҳад шуд.

Агар ду ва ё зиёда довталаб холи якгуна бигиранд, дар он сурат шумораи холҳое, ки аз дарёфти «ҳисоби дақиқи бозӣ» ба даст омадааст, ба инобат гирифта мешавад. Агар дар бахши «Ғолиби аксари даврҳо» шумори ғолибон бештар аз як нафар бошад, пас ҳамоне беҳтарин дониста мешавад, ки дар ҷадвали умумӣ холҳои бештарро ба даст овардааст. Агар холҳои ҷадвали умумӣ низ баробар бошанд, пас ҳамоне ғолиб дониста мешавад, ки дар даврҳои ғолибомадааш холҳои бештарро ба даст оварда бошад.

Даври 25-уми “ФУТБОЛДОН”: 10-15-уми декабр

Лигаи қаҳрамонҳо:

10.12.2013: МЮ – Шахтар

10.12.2013:  Галатасарай – Ювентус

11.12.2013:  Атлетико Мадрид  – Порто

11.12.2013:  Наполӣ – Арсенал

11.12.2013:  Милан – Аякс

11.12.2013:  Шалке – Базел

Лигаи Аврупо:

12.12.2013: Валенсия – Кубан

12.12.2013:  ПСВ Эйндҳовен – Черноморетс Одесса

Сабқатҳои қаҳрамонии кишварҳои аврупоӣ:

14.12.2013:  МанСитӣ – Арсенал

15.12.2013: Наполи – Интер

 Бубинем, кӣ футболро беҳтар медонад, дӯстон?

 ПС: «Футболи Тоҷикистон» ҳаққи тағйири шартҳои озмунро барои худ ҳифз мекунад. Назарҳо дар мавриди беҳтар кардани озмун низ ба инобат гирифта хоҳанд шуд.

М.Муҳаммадиев – ҷонибдори Рибери, А.Тӯйчиев – ҷонибдори Месси

0

Мӯҳсин Муҳаммадиев, сармураббии тими миллии футболи Тоҷикистон ва Алишер Тӯйчиев, капитани дастаи мунтахаби кишвар, дар интихоби беҳтарин бозигар ва беҳтарин мураббии соли 2013 ширкат карданд.

Муҳаммадиев нимҳимоятгари «Бавария»-и Мюнхен ва мунтахаби Фаронса Франк Рибериро беҳтарин бозигари соли 2013 эътироф кардааст. Тӯйчиев бошад, ҷойи аввалро ба бозигари «Барселона»-и Испания ва мунтахаби Аргентина, барандаи чоркаратаи ҷоизаи «Тӯби тиллоӣ» Лионел Месси муносиб донистааст. 

Дар рӯйхати муддаиёни ҷоизаи пурнуфузи «Тӯби тиллоии ФИФА» 33 бозигар дохиланд. Беҳтарин бозигари солро тавассути раъйдиҳӣ  ҳайати ҳакамон, ки ба он хабарнигорон, сармураббиён ва капитанҳои дастаҳои мунтахаби миллӣ шомиланд, муайян мекунанд.

Беҳтарин бозигари сол
Мӯҳсин МУҲАММАДИЕВ, сармураббии дастаи мунтахаби Тоҷикистон: 1. Франк Рибери («Бавария» ва мунтахаби Фаронса), 2. Лионел Месси («Барселона» ва мунтахаби Аргентина), 3. Криштиану Роналду («Реал» ва мунтахаби Португол).
Алишер ТӮЙЧИЕВ, капитани мунтахаби Тоҷикистон: 1. Лионел Месси («Барселона» ва мунтахаби Аргентина), 2. Франк Рибери («Бавария» ва мунтахаби Фаронса), 3. Роберт Левандовски («Боруссия» ва мунтахаби Лаҳистон).

Беҳтарин мураббии сол
Мӯҳсин МУҲАММАДИЕВ: 1. Висенте Дел Боске (мунтахаби Испания), 2. Сэр Алекс Фергюсон («Манчестер Юнайтед»), 3. Жозе Моуриню («Реал»/«Челси»).
Алишер ТӮЙЧИЕВ: 1. Юпп Хайнкес («Бавария»), 2. Сэр Алекс Фергюсон («Манчестер Юнайтед»), 3. Висенте Дел Боске (мунтахаби Испания).

Даври бозомӯзии мураббиёни футбол барои муҷаввизи дараҷаи “А”

0

Дар шаҳри Душанбе давраи бозомӯзии мураббиёни футбол барои гирифтани муҷаввизи дараҷаи “А”-и Конфедератсияи футболи Осиё (AFC) шурӯъ шуд.

Ба ин давраи бозомӯзӣ мушовири АFC Ислом Аҳмадов аз Узбакистон ва Боир Эгамбердиев, мушовири  Федератсияи футболи Тоҷикистон, раҳбарӣ мекунанд.

Ба иттилои Федератсияи футболи Тоҷикистон давраи бозомӯзии мураббиёни футбол то рӯзи 26-уми декабр идома хоҳад кард. Дар машғулиятҳо 20 мураббии тоҷик ширкат мекунанд. Инҳо Нӯъмонҷон Юсуфов, Илдар Раҳмонов, Раҷаб Расулов, Маҳмадҷон Ҳабибуллоев, Зайниддин Раҳимов, Носир Ҳамидов, Ҳикмат Фузайлов, Рустам Қурбонов, Аҳлиддин Турдиев, Тоҳир Муъминов, Ҳасан Раҷабов, Абдулло Умарбоев, Рустам Хоҷаев, Ҳусейн Шодиев, Амоншо Содатсайров, Алиёр Ашӯрмамадов, Ғайраталӣ Мираҳмадов, Алишер Ҳақбердиев, Салоҳиддин Ғафуров ва Тухтабой Абдураҳимов мебошанд.

Дар ин давраи бозомӯзӣ, инчунин, мураббии дастаи мунтахаби миллии футболи Афғонистон Муҳаммад Юсуф Коргар ва сармураббии бошгоҳи футболи «Абдиш-Ата»-и Қирғизистон Мирлан  Эшенов ширкат доранд.

Ба барномаи давраи бозомӯзӣ машғулиятҳои назариявию амалӣ дохиланд. Баъди анҷоми машғулиятҳо ба ширкаткунандагоне, ки аз рӯи барномаи омӯзиш аз санҷиш бомуваффақият  мегузаранд, сертификатҳои байналмилалии мураббиёни дараҷаи «А»-и AFC супурда мешаванд.

Рейтинги FIFA: Тоҷикистон – дар ҷойи 116-ум

0

Тоҷикистон дар рейтинг ё феҳристи нави FIFA (Федератсияи байналмилалии футбол), ки рӯзи 28-уми ноябр нашр шуд, бо 286 имтиёз мавқеашро дар мақоми 116-ум нигоҳ дошт.

Тоҷикистон дар байни 46 дастаи мунтахаби Осиё дар зинаи 15-ум ва миёни тимҳои миллии собиқ кишварҳои шӯравӣ дар зинаи 11-ум мебошад ва аз Латвия, Қазоқистон, Туркманистон ва Қирғизистон боло ҷойгир шудааст. Дастаҳои мунтахаби Украина, Русия, Арманистон, Узбакистон, Беларус, Озарбойҷон, Эстония, Молдова, Гурҷистон ва Литва пеш аз Тоҷикистон қарор гирифтаанд. 

Ёдовар мешавем, тими миллии футболи Тоҷикистон таҳти раҳбарии Мӯҳсин Муҳаммадиев, сармураббии даста, рӯзи 15-уми октябри соли равон дар шаҳри Бишкек, дар варзишгоҳи ба номи Долон Омурзоқов бар мунтахаби Қирғизистон, ки дар феҳристи FIFA дар мақоми 146-ум қарор дорад, бозии дӯстона анҷом дод ва бо ҳисоби 4-1 ғолиб омад.

Дастаи миллии Испания, қаҳрамони феълии ҷаҳону Аврупо, дар феҳристи навини FIFA дар байни 209 тими миллӣ мисли пешин дар ҷойи аввал аст. Олмон дар ҷойи дувум ва Аргентина дар ҷойи севум мебошанд. Миёни даҳ тими беҳтарини ҷаҳон, инчунин, Колумбия, Португол, Уругвай, Италия, Швейтсария, Ҳолланд, ва Бразилия ҷойгир шудаанд.

Дар байни дастаҳои мунтахаби Осиё тими миллии Эрон пешқадам аст. Баъдан тимҳои Ҷопон, Кореяи Ҷанубӣ, Австралия ва Узбакистон қарор доранд.

Рейтинги FIFA аз соли 1993-юм ба ин сӯ тартиб дода мешавад. Имтиёзҳо ба кишварҳо аз рӯи натоиҷи дастаи мунтахаби миллиашон дар давраи чаҳор сол дода мешавад. Натиҷаи беҳтарини мунтахаби Тоҷикистон дар тамоми таърихаш дар феҳристи FIFA ҷойи 106-ум дар моҳи июни соли 2013 мебошад.

Рейтинги минбаъдаи FIFA 19-уми декабри соли 2013 нашр хоҳад шуд.

Беҳтаринҳои футболи тоҷик дар моҳи ноябр

0

Федератсияи футболи Тоҷикистон (ФФТ) беҳтарин мураббӣ, беҳтарин бозигар ва беҳтарин доварро дар моҳи ноябр муайян кард.

Ҳасан Рустамов , ҳимоятгари дастаи “Равшан”-и Кӯлоб, беҳтарин бозигар, Рустам Хоҷаев, сармураббии дастаи “Хайр”-и Ваҳдат, беҳтарин мураббӣ ва Равшан Ишматов, довари FIFA аз шаҳри Қӯрғонтеппа, беҳтарин довар дар моҳи ноябр эълон шуданд. Ба ҳар кадом ҷоизаи ФФТ ба маблағи 500 сомонӣ супурда мешавад.

Ёдовар мешавем, ки Никола Кавазович, собиқ сармураббии дастаи “Истиқлол”-и Душанбе, беҳтарин мураббӣ, легионер аз Бразилия Виллер Соуза Оливейра, нимҳимоятгари тими “Истиқлол”, беҳтарин бозигар ва Равшан Ишматов аз шаҳри Қӯрғонтеппа беҳтарин довар дар моҳи май, Тоҳир Мӯъминов, сармураббии дастаи “Энергетик”-и Душанбе, беҳтарин мураббӣ, легионер аз Гана Дэвид Мауто, нимҳимоятгари тими “Равшан”-и Кӯлоб, беҳтарин бозигар ва Диловаршоҳ Орзуев аз ноҳияи Ҳисор беҳтарин довар дар моҳи июн,Олег Ширинбеков, сармураббии дастаи “Истиқлол”, беҳтарин мураббӣ, легионер аз Эрон Ҳусейни Сӯҳробӣ, ҳамлагари тими “Истиқлол”, беҳтарин бозигар ва Раҳмон Муртазоев аз Душанбе беҳтарин довар дар моҳи август, Салоҳиддин Ғафуров, сармураббии дастаи “Вахш”-и Қӯрғонтеппа, беҳтарин мураббӣ, легионер аз Гана Соломон Течи, ҳамлагари тими “Равшан”, беҳтарин бозигар ва Раҳмон Муртазоев аз Душанбе беҳтарин довар дар моҳи сентябр, ҶаҳонгирЭргашев, ҳамлагари дастаи “Истиқлол”, беҳтарин бозигар, МубинЭргашев, сармураббии дастаи “Хуҷанд”-и Хуҷанд, беҳтарин мураббӣ ва Равшан Ишматов, аз шаҳри Қӯрғонтеппа, беҳтарин довар дар моҳи октябр эълон шуда буданд.

Чжэн Чжи – беҳтарин футболбози Осиё дар соли 2013

0

Беҳтаринҳои соли 2013-ум бо ҷоизаҳои Конфедератсиюни футболи Осиё мукофотонида шуданд.

Чжэн Чжи – беҳтарин футболбози Осиё дар соли 2013.

Маросими мукофотсупорӣ рӯзи 27-уми ноябр дар пойтахти Малайзия – шаҳри Куала-Лумпур баргузор шуд. 

Чжэн Чжи, ҳимоятгари 33-солаи бошгоҳи футболи «Гуанҷоу Эвергранд»-и Чин беҳтарин бозигари Осиё дар соли 2013-ум гардид. Рақибони ӯ ҳамлагари бошгоҳи «Истиқлол»-и Эрон Ҷавод Некӯном ва нимҳимоятгари тими «Сеул»-и Кореяи Ҷанубӣ Ха Дэ Сун буданд.

Конфедератсиюни футболи Осиё, инчунин, беҳтаринҳоро аз рӯи дигар номинатсияҳо бо ҷоизаҳо сарфароз гардонд.

Лауреатҳои футболи Осиё дар соли 2013:
Алмоси Осиё – Доктор Чонг Монг-Ҷун (Кореяи Ҷанубӣ)
Орзуи Осиё – Федератсияи футболи Мянмар.
Ҷоизаи Fair рlay  Ассотсиатсияи футболи Чин.
Беҳтарин бошгоҳ – «Гуанҷоу Эвергранд» (Чин).
Беҳтарин дастаи футзал – «Чонбури Блювейв» (Тайланд).
Беҳтарин дастаи мунтахаб (занон) – Кореяи Ҷанубӣ (U-19).
Беҳтарин дастаи мунтахаб (мардон) – Ироқ (U-20).
Беҳтарин ёвари довар (занон) – Элисон Фланн (Австралия).
Беҳтарин ёвари довар (мардон) – Наги Тошиюки (Ҷопон).
Беҳтарин довар (занон) – Ямагиши Сачико (Ҷопон).
Беҳтарин довар (мардон)  – Бенҷамин Уилямс (Австралия).
Беҳтарин мураббӣ (занон) – Такемото Асако (Ҷопон).
Беҳтарин мураббӣ (мардон) – Чхой Ён Со (Кореяи Ҷанубӣ).
Беҳтарин бозигари футзал – Сафашут Туекланг (Тайланд).
Беҳтарин футболбози ҷавон (занон) – Янг Сел-Ги (Кореяи Ҷанубӣ).
Беҳтарин футболбози ҷавон (мардон) – Алӣ Аднан Кадҳим (Ироқ).
Беҳтарин бозигари Осиё, ки дар қитъаи дигар бозӣ мекунад – Юто Нагамато (Ҷопон), «Интер» (Италия).
Беҳтарин легионер, ки дар қитъаи Осиё бозӣ мекунад – Луис Гилерме Да Консейсао Силва (Бразилия), «Гуанҷоу» (Чин).
Беҳтарин футболбоззан – Ая Мияма (Ҷопон).
Беҳтарин футболбоз – Чжен Чжи (Чин).

“Саройкамар” – ғолиби мусобиқаи лигаи аввали футболи Тоҷикистон

0

Дастаи “Саройкамар”-и Панҷ ғолиби мусобиқаи лигаи аввали футболи Тоҷикистон гардид.

Футболбозони “Саройкамар” рӯзи якшанбеи 24-уми ноябр дар бозии ҷавобии финалӣ барои ҷойи якум дар мусобиқаи лигаи аввал дар меҳмонӣ бар тими “Эсхата”-и Хуҷанд бо ҳисоби 3-1 пирӯз шуданд. Голҳои “Саройкамар”-ро Ҷонибек Ғаффоров дар дақиқаи 29-ум, Парвиз Саъдиев (дақиқаи 53-юм) ва Ҳусейн Ёқубов (дақиқаи 56-ум) ба ҳадаф расонданд. Як голи “Эсхата”-ро Абдумалик Шодиев дар дақиқаи 70-ум зад. 

Ёдовар мешавем, ки бозии аввали ин дастаҳо дар ноҳияи Панҷ бо ҳисоби мусовии 2-2 анҷом ёфта буд. Ба ин тартиб, аз рӯи натоиҷи ду бозии ниҳоӣ “Саройкамар” ғолиб шуд ва дар мусобиқаи лигаи аввал мақоми аввалро касб кард. “Саройкамар” бо медалҳои тилло ва “Эсхата” бо медалҳои нуқра мукофотонида мешаванд. Инчунин бар асоси дастури мусобиқот дастаҳои “Саройкамар” ва “Эсхата” ба лигаи олӣ роҳхат гирифтанд.

Дар бозии ҷавобӣ барои ҷойи севум дастаи “Кӯктош+С”-и ноҳияи Рӯдакӣ бар тими “Далерон-Ӯротеппа”-и Истаравшан бо ҳисоби 2-1 ғалаба кард. Голҳои “Кӯктош+С”-ро Нурулло Абдуллоев  (дақиқаи 35-ум) ва Далери Исмоил (90+4) заданд. Голи меҳмононро Меҳрулло Бобоев дар дақиқаи 72-юм ба самар расонд.

Бозии аввал дар Истаравшан бо ҳисоби 3-1 ба фоидаи “Далерон-Ӯротеппа” хотима ёфта буд. Ҳамин тариқ, аз рӯи натоиҷи ду бозӣ истаравшаниҳо ғолиб шуда, мақоми севум ва медалҳои биринҷиро азони худ карданд.